Кубанските боксери ќе можат да учествуваат на професионални натпревари за прв пат од 1962 година, соопшти Боксерската федерација.
„Три ипол години работиме на договор кој одговара на филозофијата на кубанскиот спорт и кој им овозможува на спортистите да влезат во професионалниот бокс“, изјави претседателот на здружението Алберто Пуч.
Алијансата потпиша договор со мексиканската компанија „Златен прстен“, а првите борби се закажани за мај во Мексико.
„Во првата фаза ќе вклучиме тим од пет или шест боксери, кои ќе заминат во Европа или Латинска Америка, а потоа ќе се вратат во кубанската боксерска школа“, рече Пуч, кој додаде дека четворица кубански боксери веќе потпишале четири- годишни договори.
Во 1962 година, кратко по победата на револуцијата, Куба го укина професионалниот спорт, а во 2013 година се врати на професионализмот за бејзбол, одбојка и кошарка.
Боксот е на полупрофесионално ниво од 2014 година, а локалниот тим учесник во Светската боксерска серија (WSB) освои три титули во последните пет изданија на кои учествуваше.
Кубанските боксери имаат освоено 80 златни медали на светските првенства на аматерски ниво, како и 41 златен олимписки медал.
Учеството во професионалните лиги ќе го подобри нашето ниво, бидејќи ќе се соочиме со боксери на високо ниво, а тоа ќе ни овозможи да останеме во боксерската елита“, изјави двократниот последователен олимписки шампион Жулио Сезар Ла Круз.
Претседателот на Меѓународниот олимписки комитет (ИОК), Томас Бах, во декември најави дека боксот би можел да отсуствува од Олимписките игри во Лос Анџелес во 2028 година, по бројните контроверзни судиски одлуки.
