Третиот блок на РЕК „Битола” е вратен во функција во 10:24 часот и испорачува електрична енергија во електроенергетскиот систем. Испадот во ТС Битола 2 утринава делови од Битола половина час ги остави без струја.
-Стручни екипи од комбинатот ги прават неопходните подготовки за почеток на операциите за враќање на мрежа и на Блок 1. Се очекува вечерва и оваа постројка да биде ставена во функција-информираат од АД ЕСМ.
Проблем во трафостаницата на МЕПСО што се наоѓа во непосредна близина на РЕК Битола, рано утрово предизвика испад на Блок 1 и Блок 3 од електроенергетскиот систем. Веднаш по инцидентот преземени се сите мерки и активности за санација на оштетените делови во РЕК Битола, по што започнаа операции за враќање во функцијата на двата блока, соопшти АД ЕСМ.
Се очекува во претпладневните часови постројките да бидат повторно на мрежа и да испорачуваат електрична енергија.
Заради сличен проблем во електропреносниот систем, во ноември 2021 година беше тешко оштетен трансформаторот на Блок 3 на РЕК Битола и постројката беше надвор од функција повеќе од една година. Овојпат, нема сериозни штети врз опремата на РЕК Битола, а стручни лица од РЕК Битола и АД МЕПСО работат на утврдување на точните причини за денхешниот инцидент.
Потребите на потрошувачите за електрична енергија во моментов се задоволуваат од домашните капацитети на АД ЕСМ.
