Познатиот тенор Пласидо Доминго повторно е во центарот на скандал, овој пат е обвинението дека 20 години бил во контакт со водачите на криминална организација која тргувала со луѓе.
Музичкиот свет во последно време бруи за катастрофалното фијаско на Пласидо Доминго во Арената ди Верона, за кое славниот тенор дури испрати писмо со извинување до градоначалникот на Верона за неговиот настап под секое прифатливо ниво.
За време на настапот на крајот на август, Доминго ја напушти сцената во Верона бидејќи неговиот настап беше толку лош што членовите на оркестарот одбија да застанат на сцената со него за време на аплаузот. Се испостави дека во позадина има сериозни приватни проблеми, пишува „Јутарњи лист“.
Имено, аргентинскиот судија Ариел Лијо минатата недела обвини 19 лица дека користеле наводна школа за јога во Буенос Аирес како параван за трговија со луѓе, принудувајќи ги жените на секс со богати луѓе, со цел перење пари. Истрагата за синџирот на трговија со луѓе откри дека Пласидо Доминго бил во контакт со водачите на таа криминална организација повеќе од 20 години.
Според пишувањата на странските медиуми, постои видео кое ја докажува поврзаноста на оперската ѕвезда со трговијата со луѓе. Извештаите велат дека гласот на мажот кој оди на состанок со жена по име Менди, преку криминалниот ланец, е на Доминго. На снимките, кои се добиени со прислушување, Менди го нарекува човекот со кој разговара „Пласидо“.
Судијата Ариел Лијо одлучи четиринаесет од 19-те лица обвинети за трговија со луѓе за секс и пари да бидат задржани во притвор, додека нивниот имот е замрзнат. Обвинителството побара обвинение против 20 лица.
