Војната во Украина влезе во – 425 ден.
Киев: Одбивме 60 руски напади
Украинскиот Генералштаб во своето дневно резиме наведува дека Русија ги концентрира своите главни напори на изведување офанзивни операции во правците Бахмут, Авдеив и Маријин.
– Таму беа одбиени околу 60 напади на агресорите. Најжестоките битки продолжуваат за Бахмут и Маринка – велат од Генералштабот.
Забележано е и дека руските сили во неделата неуспешно се обиделе со офанзивни операции во близина на населбите Григоровка, Богдановка и Ивановское. Голем број на населени места биле оштетени од непријателските гранатирања, соопшти Генералштабот.
– Во правец на Авдијивка, непријателот изврши офанзивни операции во областите Новокалиновск и Первомај во областа Доњецк, не успеа и претрпе големи загуби – соопштија од Генералштабот.
Во правец на Маринка, во текот на денот, украинските сили, како што велат, одбиле бројни непријателски напади во северните и централните делови на Маринка, како и во областа Новомихајловка во областа Доњецк.
– Во исто време на непријателско гранатирање беа подложени Красногоровка, Георгиевка, Маринка, Победа, Новомихајловка и Праскојеевка од Доњецката област – пишува во резимето.
Русија: Црноморската флота одби напад со дрон врз Севастопол
Силите на Црноморската флота собориле беспилотно летало на надворешното сидриште на Севастопол, а уште еден беспилотен авион експлодирал, но не го оштетил објектот кон кој бил насочен, објави гувернерот на Севастопол, Михаил Развозаев.
Тој претходно на Телеграм напиша дека Црноморската флота одбила напад со беспилотни летала на надворешното сидро на Севастопол, пренесува Тас.
– Денеска со почеток во 3 часот и 30 минути е извршен обид за напад на Севастопол. Досега, едното беспилотно летало е уништено од одбранбените сили за противподморничка војна, а другиот сам експлодирал. Сè се случило на надворешното сидриште на Севастопол и ниту еден објект не бил оштетен. Во моментов во градот е мирно, но сите сили и служби се во готовност – напиша Развозајев.
Агенцијата РИА Новости наведува дека поморскиот патнички сообраќај во Севастополскиот залив е прекинат, а организиран е автобуски превоз меѓу северниот и централниот дел на градот.
Севастопол е главната поморска база на Црноморската флота и украинската војска се обиде да ја нападне со беспилотни летала во неколку наврати во текот на изминатите неколку месеци, според Тасс.
Битката за Бахмут трае веќе 14 месеци
Руското Министерство за одбрана објави дека руските сили зазеле уште две територии во Бахмут, додека продолжуваат да се обидуваат да преземат целосна контрола врз градот. Битката за Бахмут се претвори во една од најкрвавите во војната во Украина. Тоа трае веќе 14 месеци, а градот е речиси целосно уништен од артилериско гранатирање и улични борби.
Локалните украински власти вчера објавија дека Харков и околните области биле цел на најмалку пет руски ракети, пренесува Укринформ.
