Да се има силно срце во педесеттите е клучно, особено затоа што тој витален орган поминува низ големи промени како што стареете. Вашето срце е мускул, што значи дека природно слабее со текот на времето. Диетата може да ви помогне да го забавите тоа.
Постојат одредени намирници и навики во исхраната кои можат да ви помогнат да го одржите здравјето на срцето, пишува Eat this.
Избегнувајте газирани пијалоци
Според Арики Хошајт, нутриционист, газираните пијалоци, вклучително и „диеталните“, како и сите други вештачки засладени пијалоци, се контрапродуктивни кога станува збор за здравјето на срцето.
Некои луѓе можеби мислат дека префрлањето на диетални верзии на газирани пијалоци им помага да ослабат и да заштедат калории, но важно е да се знае дека газираните сокови може сериозно да го оштетат здравјето на вашето срце.
„Вештачки засладените пијалоци се поврзани со зголемен ризик од кардиометаболни заболувања, а една студија дури покажува дека секојдневното консумирање диетални пијалоци може да предизвика 36 отсто поголем ризик од метаболички синдром и 67 отсто поголем ризик од дијабетес тип 2“, вели Хошајт.
Повеќе зеленчук и овошје
Јадењето доволно овошје и зеленчук може да помогне при многу различни здравствени проблеми, како и да го намали ризикот од многу болести. А кога станува збор за здравјето на срцето, ова е важна навика што треба да се усвои.
“Соединенијата од зеленчук и овошје кои ги штитат растенијата од нивните природни непријатели, пак, нè штитат од нашите – како што се срцевите болести, дијабетесот, ракот и оштетувањето на мозокот” велат нутриционистите.
Зеленчукот е полн со влакна, витамини, минерали и антиоксиданси, а овие моќни микронутриенти работат заедно за да се борат против срцевите заболувања и да го одржуваат ниско ниво на холестерол.
Повеќе риби
Конзумирањето риба и други извори на здрави масти може да ви помогне да одржите силно, здраво срце, особено ако заменува некои од изворите на нездрави масти во вашата секојдневна исхрана.
Омега-3 масните киселини што ги добивате од јадење лосос и други масни риби обезбедуваат заштита од срцев удар, мозочен удар, рак и воспалителни болести како што е ревматоидниот артритис.
Доволно влакна во исхраната
Вклучувањето на доволно влакна во вашата дневна исхрана е клучно за подобро здравје на срцето и намалување на холестеролот, што е особено важно како што стареете.
Изберете храна богата со растителни влакна како цели зрна, грав, леќа, овошје и јаткасти плодови – бидејќи растворливите влакна се врзуваат за честичките на холестеролот во тенкото црево, спречувајќи го да навлезе во вашиот крвоток.
