Седум лица загинаа во изминатите 24 часа бидејќи два екстремни временски настани ја поделија Италија меѓу шумски пожари на југ и жестоки бури на север.
Пожарите на Сицилија доведоа до привремено затворање на аеродромот во Палермо, откако температурите во градот во понеделникот се искачија на 47 степени Целзиусови.
Се наведува дека 88-годишна жена починала на неколку километри од главниот град на Сицилија во вторникот, откако пожар ги спречил службите за итни случаи да стигнат до неа. Попладнево во пожар зафатена куќа во градот Чиниси, во близина на аеродромот, се пронајдени тела на две лица на возраст од околу 75 и 77 години.
Властите затворија дел од автопатот бидејќи на островот беа пријавени повеќе од 55 шумски пожари. Стотици пожарникари од други региони во Италија требаше да пристигнат за да помогнат во гаснењето на пожарот.
„Никогаш не сме виделе вакво нешто“, изјави жител за италијанската новинска агенција Анса. „Бевме опкружени со оган. Не можевме да одиме никаде. Ноќта ја поминавме на плоштад. Тоа беа страшни моменти“.
Невремето во Ломбардија однесе четири животи, вклучувајќи го и оној на 16-годишно девојче кое загина додека кампуваше во Цеделог кога дрво падна врз нејзиниот шатор.
Една 58-годишна жена загина откако ја згмечи дрво во Монца, а пар, двајцата на 19-годишна возраст, загинаа откако возачот изгубил контрола над нивниот автомобил на лизгавиот пат во Варезе.
Во близина на Палермо, повеќе од 120 семејства се евакуирани од своите домови од понеделникот, бидејќи облаците од чад и пепел се оддалечија кон центарот на градот, правејќи го воздухот недишлив, а сирените на противпожарните возила и амбулантите одекнуваат низ градот.
Повеќе од 200 луѓе во Палермо побарале лекарска помош поради вдишување чад. Во раните попладневни часови, главните улици на главниот град на Сицилија, вообичаено преполни со туристи, беа речиси пусти.
„Изгубивме се“, вели еден жител. „Немав време да се пакувам. Сега морам да најдам место за спиење вечерва“.
Температурите во Палермо пораснаа во понеделникот, соборувајќи го претходниот рекорд за градот од 44,8 степени Целзиусови поставен во 1999 година.
Болниците низ градот објавија нагло зголемување на бројот на луѓе кои бараат итна помош за болести поврзани со топлина. Стотици пациенти во болница на северот на Палермо беа евакуирани и префрлени во друга здравствена установа, а две болници ги прекинаа рутинските прегледи.
Во источниот сицилијански град Катанија, температурите се приближија до 47 степени Целзиусови, а луѓето се мачеа со прекини на струја и проблеми со водата. Локалниот аеродром, петти по големина во Италија, беше затворен минатата недела по пожар во зградата на терминалот и повторно беше отворен само за неколку летови, пишува Гардијан.
