Специјалната операција на руската армија во Украина денеска влезе во својот 235-ти ден. Руската армија одби офанзивен обид во областа Херсон, во правец на Берислав. Претседателот на Украина Володимир Зеленски синоќа изјави дека украинската армија е во тешка ситуација во регионите Доњецк и Луганск.
Зеленски: Продолжени борби, најтешки во регионот на Донбас
Украинската армија сè уште го држи стратешкиот источен град Бахмут и покрај повторените руски напади, додека ситуацијата во регионот на Донбас е сè уште многу тешка, изјави синоќа украинскиот претседател Володимир Зеленски.
Тој во видео-обраќање рече дека руските ракети и беспилотни летала продолжуваат да ги гаѓаат украинските градови, предизвикувајќи уништување и жртви, пренесе Ројтерс.
– Активните борби продолжуваат во различни области на фронтот. Ситуацијата е се уште многу тешка во регионите Доњецк и Луганск – рече Зеленски.
Тој додаде дека најтешка е ситуацијата во правец на Бахмут, како и претходните денови, но дека тие ги држат своите позиции.
Претседателот на Украина, исто така, тврди дека речиси 65.000 Руси се убиени од почетокот на конфликтот во таа земја, што е многу поинаква од официјалната проценка на Москва, наведува британската агенција.
Франција ќе обучува 2.000 украински војници
До 2.000 украински војници ќе поминат обука во Франција која ќе трае неколку недели, изјави францускиот министер за вооружени сили Себастиен Лекорн за весникот Le Parisien.
Маск: Продолжуваме да го финансираме интернетот во Украина
Американскиот милијардер Илон Маск синоќа изјави дека неговата компанија SpaceX ќе продолжи да го финансира интернетот во Украина преку системот Starlink.
– И по ѓаволите… иако Старлинк сè уште губи пари, а другите компании добиваат милијарди долари од даночните обврзници, ние само ќе продолжиме да ја финансираме владата на Украина – објави Маск на Твитер.
Маск вчера изјави дека неговата компанија не може на неодредено време да го финансира Starlink во Украина.
Мрежата Starlink е дизајнирана да обезбеди пристап до Интернет преку голем број микросателити.
Стремусов: Надежите на Киев за офанзива во регионот Херсон пропаднаа
Ситуацијата на одбранбената линија во регионот Херсон е под контрола, украинската армија се опоравува по неуспешен офанзивен обид, изјави за Спутник заменик-шефот на регионалната администрација Кирил Стремусов.
Според него, надежите на Киев за офанзивна операција во регионот Херсон пропаднале.
Во саботата беше објавено дека украинската армија се обидела да изврши офанзива во областа Херсон во правец на Берислав, а нападот го одбиле вооружените сили на Русија.
– Се е во ред, нема промени. Сите напади беа одбиени, линијата на одбрана беше целосно организирана. Украинските нацисти си ги лижат раните по вчерашниот ден. За нас се е под контрола – изјави Стремусов.
Според него, синоќа немало активни офанзивни акции на украинските сили.
Воздушна опасност на територијата на цела Украина
Воздушна опасност беше прогласена во неделата во речиси сите области на Украина, соопштија локалните воени администрации.
Предупредувањата за опасност од воздух и повиците до луѓето да одат во засолништа беа објавени на Телеграм од локалните администрации на регионите Полтава, Чернигив, Черкаси, Черновци, Одеса, Ивано-Франковск, Ровнен и Суми, како и градоначалникот на Хмелницки.
Претходно беше објавено дека воздушната опасност е прогласена во Киев и во делот на регионот Запорожје кој е под контрола на украинските сили.
Руските трупи продолжуваат да пристигнуваат во Белорусија
Во Белорусија продолжуваат да пристигнуваат ешалони со руски војници кои се дел од регионалната групација на Здружените држави, соопшти прес-службата на белоруското Министерство за одбрана.
– Во Република Белорусија продолжуваат да пристигнуваат ешалони со руски војници, кои се дел од регионалната групација на војници – се наведува во пораката објавена во саботата навечер.
