Треската од протестот „Конвојот на слободата“ полека но сигурно се шири во сите делови на светот. Демонстрациите, кои започнаа како бунт на канадските камионџии против задолжителните вакцини и суровите антивирусни мерки, стануваат порадикални, при што полицијата во градовите од Париз до Нов Зеланд беше принудена да ги разбие насилните протести со водени топови и да извади оклопни возила на улиците.
Демонстрациите во Нов Зеланд моментално се најинтересни за јавноста. Во оваа островска држава граѓаните веќе шест дена кампуваат пред зградата на парламентот во Велингтон, а ни циклонот Дови не успеа да ги избрка, предизвикувајќи прекин на електричната енергија, лизгање на земјиштето и евакуација на неколку стотици луѓе.
Кога виде колку се упорни демонстрантите, претседателот на парламентот Тревор Малард се одлучи на идеја без преседан. Почна да пушта ултра гласна музика преку звучниците. Маралд на тој начин им го пушти на демонстрантите безвременскиот хит „Макарена“, а тие возвратија со пуштање на нивната музика.
Насобраните демонстранти го загрижуваат и вицепремиерот Грант Робертсон, кој рече дека секој Новозеланѓанец има право на мирни протести, но оцени дека овие демонстрации отишле многу подалеку од тоа.
„Мислам дека реториката на овие демонстрации е многу загрижувачка. Има нешто тажно во тоа, има елемент на теорија на заговор во која луѓето си дозволија да се вклучат“, рече тој.
Демонстрантите од Нов Зеланд, како и нивните „канадски колеги“, се спротивставуваат на мерките за коронавирус наметнати од владата и бараат укинување на задолжителната вакцинација за луѓето кои работат во сектори како што е здравството.
Од четвртокот, кога почнаа протестите, се уапсени 120 лица. Ова предизвика остра реакција во јавноста, поради што припадниците на безбедносните сили ги прекинаа апсењата, но употребија водени топови за да го разбијат протестот.
Во Париз полицијата извади оклопни возила
Ништо помирно не е ниту во Париз, каде полицијата употреби солзавец против демонстрантите на Елисејските полиња во Париз во саботата, веднаш по почетокот на протестите.
Меѓутоа, возила со демонстранти успеаја да ги поминат полициските контролни пунктови во центарот на Париз со цел да го попречат сообраќајот околу Триумфалната капија.
Полицијата побара демонстрантите да се движат откако се искачија со возила среде кружен тек околу триумфалната порта.
Поради огромниот број граѓани, во Париз беа распоредени речиси 7.200 полицајци, а за прв пат по немирите за време на демонстрациите на „жолтите елеци“ во 2018 година, жандармеријата беше принудена да излезе со оклопни возила на улица.
Камиони од цела Европа доаѓаат во Брисел
Голема блокада беше најавена и во Брисел на 14 февруари. Во главниот град на Белгија се очекува да пристигне конвој камиони од цела Европа. Се проценува дека на овој протест планираат да излезат околу 10.000 граѓани.
Градоначалникот на Брисел, Филип Клоз му забрани влез на конвојот во главниот град на Белгија. Клоус рече дека градот во соработка со белгискиот министер за внатрешни работи донел ваква одлука бидејќи протестите не биле пријавени.
Во Канада веќе две недели беснеат протести
Во Канада, каде што започнаа протестите, камионџиите протестираат повеќе од две недели поради задолжителната вакцинација против коронавирус и блокирање на улици во градовите ширум земјата. Пред шест дена беше блокиран Амбасадорскиот мост меѓу Канада и американскиот град Детроит и покрај судската одлука за прекин на блокадата.
Бидејќи овој мост е една од најважните транспортни правци меѓу Канада и САД, неколку американски компании мораа да ги затворат погоните во САД. Повеќедневната блокада почна да им нанесува економски загуби на двете земји, па канадските власти беа принудени да преземат порадикални чекори.
Кордони полициски формации пристигнаа на мостот во саботата, па многу демонстранти беа принудени да го напуштат мостот. Но, снимките кои се шират на социјалните мрежи покажуваат како додека камионите се отстрануваат од блокадата на мостот, граѓаните се собираат пеш за да го поддржат протестот.
Претходно, канадската провинција Онтарио прогласи вонредна состојба поради протестот на возачите на камиони кои го парализираа главниот град, а покраинскиот премиер Да Форд вети дека ќе направи се што е потребно за да се прекинат блокадите.
Да потсетиме, лидерите на движењето на камионџиите рекоа дека немаат намера да ги расчистуваат улиците и дека се подготвени да се спротивстават на властите додека премиерот Џастин Тридо не се откаже од барањата за вакцинација.
Тие, исто така, бараат смена на владата на Трудо, иако таа е одговорна за воведување неколку мерки, додека повеќето се донесени од провинциските влади.
