Европската агенција за лекови (ЕМА) денеска ја одобри антивирусна пилула од производителот Fajzer, која се продава под името Паксловид (Paxlovid) и која ќе стане првиот орален антивирусен лек против таа болест одобрен во Европската унија.
„Паксловид е првиот орален антивирусен лек препорачан во ЕУ за третман на ковид-19“, се вели во соопштението на ЕМА.
Истражувањата покажаа дека лекот значително ги намалува хоспитализирањата и смртноста кај пациенти со ризик од развој на тешка болест и треба да биде ефикасен против вирусот омикрон.
Антивирусни лекови делуваат така што ја намалуваат способноста на вирусот да се реплицира и на тој начин ја инхибираат болеста.
Овој тип на лек може да означи чекор кон крајот на пандемијата бидејќи е лесен за употреба, може да се зема дома со чаша вода.
Европското регулаторно тело препорача одобрување на употребата на Paxlovid за третман на ковид-19 кај возрасни на кои не им е потребен дополнителен кислород и кои имаат зголемен ризик од развој на тешка болест.
САД, Канада и Израел се меѓу ретките земји кои веќе ја одобрија употребата на оваа антиковидна пилула на Fajzer.
За време на испитувањето, пилулата им била дадена на пациенти пет дена по почетокот на симптомите, а во текот на следниот месец, само 0,8 отсто од пријавените 1.039 случаи завршиле во болница, наспроти 6,3 отсто од оние кои примиле плацебо.
Немаше смртни случаи во групата Паксловид, додека имаше девет смртни случаи во плацебо групата, соопшти ЕМА.
Сега ЕМА ќе ги проследи своите препораки до Европската комисија, која треба да донесе одлука за одобрување на лекот за да може да се применува во сите земји на Унијата. Одобрувањето на Европската комисија обично е набргу по одлуката на ЕМА, од неколку часа до неколку дена.
ЕМА веќе ја одобри употребата на Paxlovid во итни случаи во декември.
Европскиот регулатор се уште размислува за слично барање за одобрување на антиковид пилулата од американскиот производител на лекови Мерк.
