Илјадници Иранци протестираа денеска во југоисточниот дел на земјата во знак на сеќавање на жртвите од нападот на демонстрантите на 30 септември од страна на безбедносните сили познат како „крвавиот петок“.
Амнести интернешенел соопшти дека безбедносните сили убиле најмалку 66 лица во септември откако пукале врз демонстрантите во Захедан, главниот град на провинцијата Систан-Балучистан, објави Ројтерс.
Властите соопштија дека судирите биле предизвикани од неистомисленици.
На видеото објавено на Твитер од активистот 1500 Tasvir се гледа како илјадници луѓе повторно маршираат во Захедан.
Друго видео од југоисточниот град Каш покажува демонстранти како газат и кршат уличен знак со името на генералот Касем Сулејмани, кој беше убиен во напад на американско беспилотно летало во 2020 година во Ирак.
Јавниот бес во пресрет на пукањето на 30 септември беше поттикнат од наводите дека полицаец силувал локална тинејџерка.
Властите соопштија дека случајот е под истрага.
Антивладините демонстрации избија и во септември по смртта на 22-годишната Махса Амини, која почина откако беше приведена од полицијата за морал поради неправилно носење хиџаб.
Демонстрациите низ целата земја оттогаш се претворија во народен бунт, во кој се вклучени сите, од студенти до лекари, адвокати, работници и спортисти, со гнев главно насочен кон врховниот водач ајатолахот Али Хамнеи, соопшти агенцијата.
