Повеќе од една третина од граѓаните на Македонија веруваат дека Србија е најголемиот сојузник на нивната земја, додека Бугарија ја сметаат за најголем непријател, покажува истражувањето на фондацијата „Конрад Аденауер“.
Како што се наведува, во однос на перцепцијата која земја е најголем сојузник на Македонија, 37,4 отсто од граѓаните сметаат дека тоа е Србија, 24,1 отсто немаат одговор, додека 19,8 отсто сметаат дека тоа се САД, 5,8 отсто дека тоа е Турција, а 5,4 отсто дека тоа е Германија.
На прашањето која земја е најголемиот непријател на Северна Македонија, 44 отсто од испитаниците одговориле дека тоа е Бугарија, додека 12,1 отсто сметаат дека тоа е Русија.
Речиси две третини или 65,7 отсто го поддржуваат проектот „Отворен Балкан“, додека 15 отсто не го поддржуваат, што значи дека 50,7 процентни поени повеќе ја поддржуваат оваа форма на поблиска соработка меѓу Македонија, Албанија и Србија.
– Ова истражување на јавното мислење во Македонија објавено во публикацијата „30 години надворешна политика и одбрана“ е спроведено во текот на август 2022 година на 1.111 испитаници.
За членство на Македонија во ЕУ гласале 63,8 отсто. Според Фондацијата „Конрад Аденауер“, овој процент, иако се уште е многу висок, покажува јасни негативни трендови во однос на првите две децении од независноста.
На прашањето кога мислат дека Северна Македонија ќе влезе во ЕУ, 28 отсто од испитаниците одговориле дека тоа никогаш нема да се случи, што е најголемата група, додека 23,7 отсто изразиле песимизам преку одговорот дека не знаат кога ќе се случи, т.е. дека немаат одговор, вели „Конрад Аденауер“.
