Девети ден од протестите против францускиот предлог.
Лидерот на најголемата опозициска партија ВМРО-ДПМНЕ, Христијан Мицкоски изјави дека „сагата конечно треба да заврши“ со неприфатливиот француски предлог за отстранување на бугарското вето и почеток на преговорите на Македонија со ЕУ.
„Оваа сага конечно треба да заврши. И во 21 век Македонците повторно се борат за својот идентитет. Нема врска со европско, ниту со Европа. Тоа е суштината и затоа народот е на улица и затоа протестира“, изјави Мицкоски на новинарите на почетокот на деветтиот протест организиран поради францускиот предлог.
Тој ја обвини владата дека сака да го протурка францускиот предлог на шверцерски начин и затоа на парламентот на Македонија (кој во четврток треба да го разгледа тој документ поддржан од целата ЕУ) не го достави билатералниот протокол со Бугарија. кој, тврди тој, е дел од францускиот пакет.
„Протоколот се уште не е на дневен ред, ниту некој знае што содржи протоколот, кој е суштински документ. Сè друго е парада, а јас би рекол, некаква атракција и забава за оние кои го поддржуваат ова. Во крајна линија е протоколот. Протоколот не е испорачан, ниту мислам дека ќе го достават, бидејќи сето ова планираат да го прошверцуваат, како што тоа го прават последните пет години“, рече Мицкоски.
Неколку илјади граѓани учествуваа и на вечерашните протести против францускиот предлог, кои се одржаа под мотото „Не на ултиматумот, благодарам“, со поддршка на опозициските партии ВМРО ДПМНЕ и Левица.
Почетокот на преговорите на ЕУ со Македонија е блокиран со ветото на Бугарија од ноември 2020 година поради спор околу јазикот и историјата.
Да не заборавиме една година претходно, европскиот пат на овие две земји беше блокиран од Франција, инсистирајќи на промена на методологијата за преговори.
