Шведска ги исполни условите поставени од Турција за влез во НАТО, изјави министерот за надворешни работи Тобијас Билстром.
Говорејќи на прес-конференција заедно со британскиот министер за надворешни работи Џејмс Клеверли во вторникот, Билстром рече дека со воведувањето на новиот закон за тероризам, Шведска ги исполнила последните услови за пристапување во Алијансата договорени во трилатералниот план на Финска, Шведска и Турција.
„Во Шведска неодамна стапи на сила нов закон со кој се криминализира учеството во терористичка организација на кој било начин, без разлика дали таа ја промовира, зајакнува или поддржува. Со ова ги исполнуваме последните делови од нашиот договор“, изјави Билстром, пренесува CNN.
Британскиот министер за надворешни работи Џејмс Клеверли ја повтори поддршката на Велика Британија за вклучување на Шведска во НАТО.
„Мојот став е јасен дека Шведска мора и ќе влезе во НАТО и треба да го направи тоа што е можно поскоро. Ќе продолжиме да се залагаме за брзо завршување на процесот на пристапување“, рече Клеверли.
Британскиот министер нагласи и дека во интерес на Турција е „Шведска и брзо да стане членка на алијансата“.
Шведска ја објави својата намера да се приклучи на НАТО преку политиката на отворени врати во мај минатата година, само неколку недели откако Русија ја започна својата инвазија на Украина.
