Швајцарија одлучи да инвестира 2,1 милијарди евра со цел да и обезбеди на својата армија модерно оружје и опрема, како и обука, а со тоа и да ја зајакне националната одбрана.
Долниот дом на Федералното собрание неодамна го одобри буџетот, со кој беа издвоени 235 милиони евра за набавка на командни и комуникациски системи, а 390 милиони евра ќе бидат потрошени за нови борбени возила.
Според порталот „Дефенс пост“, Швајцарија планира да набави и систем за нуклеарна, биолошка и хемиска заштита вреден 110 милиони евра, додека 47 милиони евра се инвестираат во симулатори од разни видови.
Покрај тоа, околу 707 милиони евра се наменети за набавка на лична опрема за војници, муниција, како и системи за сајбер и ИТ војна.
Швајцарското воено воздухопловство ќе добие и нова логистичка, тренинг и командна инфраструктура во вредност од 575 милиони евра.
Повеќе жени во војската
Швајцарската влада во март исто така откри дека има за цел што повеќе жени да се приклучат на армијата. Имено, само 0,9 отсто од персоналот во швајцарската армија се жени. Владата сака да го зголеми тој сооднос на најмалку 10 проценти до 2030 година.
За таа цел, се предлага да се воведат специјални служби за жени со цел да се зголеми нивниот број во армијата.
