Црногорската влада на вчерашната електронска седница на собраниската расправа за изгласување недоверба на Владата ги усвои измените на одлуката со кои се олесни приемот во црногорско државјанство.
Пред една година, владата се повлече од усвојувањето на одлуката со која се олесни приемот за црногорско државјанство по протестите на граѓаните и опозицијата, која тврдеше дека сака да го прекројува избирачкиот список. Тие тогаш блокираа одредени патишта, а организатор на протестот беше Патриотскиот сојуз Комити.
Донесените измени на одлуката, како еден од условите за добивање црногорско државјанство, покрај постојан престој, ќе бидат и привремен, што досега не беше случај.
Измените на одлуката ќе овозможат побрзо стекнување на црногорското државјанство, бидејќи досега привремениот престој кој траеше пет години и беше услов за добивање постојан престој, не се сметаше во времето потребно за стекнување државјанство.
Законот предвидува дека црногорското државјанство може да се стекне со прием доколку, меѓу другото, некој законски и континуирано престојува во Црна Гора десет години пред да аплицира за прием, додека во одлуката за критериумите за утврдување на условите за стекнување на црногорско државјанство со прием е предвидено дека легален престој значи постојан престој.
Владата ги донесе измените на одлуката без знаење на претставникот на Министерството за внатрешни работи, кое е задолжено да го предложи тој документ.
Сегашниот Закон за државјанство е многу строг и забранува двојно државјанство освен во некои посебни ситуации.
Многу граѓани кои дојдоа во Црна Гора како бегалци пред 30 години се уште го немаат решено државјанството.
Сегашниот Закон за црногорско државјанство беше донесен во февруари 2008 година, две години по независноста на Црна Гора.
Пратениците на повеќето од тогашните опозициски партии, а сега и партиите кои ја сочинуваат владата, законот го оценија како „ригиден и дискриминаторски“, особено кон Србите во Црна Гора, бидејќи според законот тие не можат да добијат црногорско државјанство доколку се државјани на Србија.
Во Црна Гора живеат 64.746 странци, што е околу десет отсто од вкупното население.
