Русија и НАТО преговараа седум дена во обид да ја решат кризата на границата со Украина. Меѓутоа, судејќи според изјавите на руските претставници, разговорите дојдоа во застој, бидејќи не беше исполнет основниот услов на Русија – гаранција дека Украина нема да стане дел од НАТО алијансата.
Соединетите држави и нивните сојузници одлучно го отфрлија барањето на Москва за безбедносни гаранции за неширење на НАТО, но двете страни се согласија да ја остават отворена вратата за понатамошни разговори за контрола на оружјето и мерки за градење доверба.
„НАТО може да распореди дополнителни трупи“
По четиричасовни разговори меѓу претставниците на Алијансата и Русија во Брисел, генералниот секретар на НАТО Јенс Столтенберг изјави дека на Москва нема да и биде дозволено да диктира безбедносни аранжмани на други земји и да создава опасни сфера на влијане.
„Постои реален ризик од нов вооружен конфликт во Европа. Има значителни разлики меѓу сојузниците на НАТО и Русија. „Нема да биде лесно да ги премостиме нашите разлики, но тоа е позитивен знак дека сите сојузници на НАТО и Русија седнаа на иста маса и се занимаваа со суштински теми“, рече Столтенберг, обраќајќи им се на медиумите, пренесува Гласот на Америка.
Столтенберг посочи дека каква било употреба на сила против Украина би била сериозна политичка грешка за која Русија би платила висока цена.
„НАТО би можел да распореди дополнителни трупи кај своите источни сојузници доколку Русија повторно употреби сила против Украина – од која го анектираше полуостровот Крим во 2014 година“, рече генералниот секретар на Алијансата.
Трпението на Русија е при крај
Од друга страна, министерот за надворешни работи на Русија, Сергеј Лавров изјави дека барањата НАТО да не се шири или распоредува оружје во Украина и другите поранешни советски републики се клучни за напредок во преговорите за украинската криза.
Лавров рече дека Москва нема да чека бесконечно и дека очекува писмен одговор од САД и НАТО на нејзините барања следната недела, во кој ќе наведе дека распоредувањето војници и оружје на НАТО во близина на руската граница е безбедносен предизвик кој мора веднаш да се реши.
„Ни снема трпението. Западот е воден од ароганција и ги зголеми тензиите со кршење на своите обврски и потези против здравиот разум“, рече Лавров.
Заменик-министерот за надворешни работи на Русија Александар Грушко, исто така, рече дека ќе предупреди дека дополнителното влошување на односите меѓу двете страни може да донесе, како што рече, непредвидливи последици за европската безбедност.
„Меѓу Москва и САД не е постигнат напредок. Работите ќе бидат појасни кога НАТО ќе ги претстави своите предлози. Добро е што двете страни искрено разговараа меѓу себе“, изјави заменик-шефот на руската дипломатија.
Овонеделните разговори меѓу САД и Русија во Женева и состанокот на Советот НАТО-Русија во Брисел се одржаа во време кога Киев и Западот стравуваа дека акумулацијата на руските сили во близина на Украина ќе укаже на руска инвазија на таа земја.
Русија, која го анектира украинскиот полуостров Крим во 2014 година, негира дека планира напад врз Украина, но го предупреди Западот дека проширувањето на НАТО кон другите поранешни советски земји е „црвена линија“ што не смее да се помине. Во последно време Русија силно инсистира НАТО да не носи војници во Грузија.
Затоа, воените аналитичари заклучуваат дека неделата зад нас била залудно потрошена и дека наместо деескалација на тензиите, војната ја имаме сè уште отворена, а некои би рекле одредена опција.
