Во тек е 212-от ден од руската специјална воена операција во Украина
Референдуми за присоединување кон Русија денеска во 4 украински региони
Жителите на самопрогласените Народни републики Доњецк и Луганск (ДНР и ЛНР), како и на териториите на регионите Херсон и Запорожје во Украина, кои се под руска контрола, од денеска до 27 септември ќе гласаат на референдуми за приклучување кон Русија. .
Жителите на самопрогласените ДНР и ЛНР ќе се изјаснат дали „го поддржуваат приклучувањето на нивните републики кон Русија како федерален ентитет“.
Жителите на Запорожје и Херсон ќе бидат прашани дали се за „одвојување на регионот од Украина, создавање независна држава и последователно приклучување кон Русија како федерален субјект“.
НАТО: Референдумите немаат легитимитет
НАТО го осуди одржувањето на референдуми на истокот на Украина, нагласувајќи дека тие немаат легитимитет и претставуваат грубо кршење на Повелбата на ОН.
Финска: Се поголем број Руси ја минуваат границата за да ја избегнат мобилизацијата
Бројот на руски државјани кои влегле во Финска во четвртокот се зголемил повеќе од двојно во споредба со претходната недела, објави во петокот граничната полиција на земјата.
„Воената полиција ги повлекува учениците од настава поради мобилизација“
Мобилизацијата која е во тек во Русија „малку е веројатно дека ќе произведе ефективни војници и ќе предизвика значителна домашна реакција за мала добивка“, наведува во својот извештај на Институтот за проучување на војната (ISW).
Според извештаите на ISW и Гардијан, руските власти веќе почнале да ги прекршуваат своите обврски дека треба да се регрутираат само мажи со воено искуство, но не и студенти. Снимките од Русија покажуваат како воената полиција ги повлекува учениците од часовите, наводно заради мобилизација, пренесува ISW.
ИТ работниците ослободени од мобилизација
Руското Министерство за одбрана издаде соопштение дека луѓето кои работат во клучни места во секторите за информатичка технологија, финансии и комуникации во земјата ќе бидат ослободени од делумна мобилизација.
Украинците им се заблагодаруваат на странските борци таму е и македонското знаме
На Твитер профилот „Украински одред“ се појави видео со Украинци кои им се заблагодаруваат на странските борци кои се борат во украинските редови против Русија.
ДНР: Седум загинати во гранатирање на украинските сили
Штабот на територијалната одбрана на самопрогласената Доњецка Народна Република (ДНР) соопшти дека во изминатите 24 часа седум цивили биле убиени при гранатирање на територијата на ДНР од страна на украинските војници. Во гранатирањето повредени се осум лица, јави агенцијата РИА Новости.
Земан: Путин можеби не блефира
Претседателот на Чешка, Милош Земан, предупреди дека руската политика станува се поирационална и дека е можно Владимир Путин да не блефира кога му се заканува на светот со нуклеарно оружје.
„За жал, ирационалноста е се поприсутна во руската политика. Токму затоа не се осмелувам да тврдам дека нуклеарното заплашување е само блефирање. На крајот на краиштата, самиот Путин во своето обраќање јасно кажа: Јас не блефирам“, рече Земан во интервју за чешкиот дневен весник „Млада Фронта Днес“.
Лавров: Објавете ги имињата на луѓето чии тела беа расфрлани во Буча
Рускиот министер за надворешни работи Сергеј Лавров го повика генералниот секретар на Обединетите нации Антонио Гутереш да побара од украинските власти да го објават списокот на загинатите во украинскиот град Бучи.
„Ве молиме побарајте од украинските власти да го направат овој едноставен чекор и да ги објават имињата на луѓето чии тела беа расфрлани во Буча. Ова го барам со месеци, но никој не сака да одговори. Господине генерален секретар, најмалку што можете е да го искористите својот авторитет“, рече Лавров.
ОН: Најдовме докази за руски воени злосторства во Украина
Комисијата на ОН соопшти дека пронашла докази за руски воени злосторства извршени во Украина, наведувајќи ги бомбардирањата, тортурата и сексуалното насилство.
„Врз основа на доказите собрани од Комисијата, беше заклучено дека во Украина се извршени воени злосторства“, изјави шефот на Истражната комисија пред Советот за човекови права на ОН.
Комисијата беше формирана во мај за да ги испита наводите за воени злосторства. Досега тие се фокусираа на четири региони: Киевската област, Харковската област, Сумиската област и Черниговската област.
„Бевме изненадени од големиот број егзекуции во областите што ги посетивме. Комисијата во моментов истражува такви смртни случаи во 16 градови и населени места“, рече Ерик Мозе, претседател на комисијата.
