Рускиот претседател Владимир Путин денеска изјави дека острата ескалација на израелско-палестинскиот конфликт е пример за неуспех на политиката на Соединетите Американски Држави на Блискиот Исток.
Путин „изрази жалење за ескалацијата во Израел“, нарекувајќи ја „јасен пример за неуспехот на американската политика на Блискиот Исток“. Тој истакна дека средбата со ирачкиот премиер Мухамед ал Судани се одржува во контекст на светската криза.
„Украинската криза продолжува и, за жал, гледаме нагло влошување на ситуацијата на Блискиот Исток. Мислам дека многумина ќе се согласат со мене дека ова е јасен пример за неуспехот на политиката на САД на Блискиот Исток, која се обидоа да го монополизираат решението, но, за жал, не беа ангажирани во изнаоѓање компромиси прифатливи за двете страни, туку, напротив, промовираа свои идеи за тоа како тоа треба да се направи и извршија притисок врз двете страни“, рече Путин.
Рускиот претседател потоа се обиде да објасни што точно мисли.
„Токму на двете страни, сега на едната страна, па на другата страна, но секој пат без да се земат предвид основните интереси на палестинскиот народ. Мислам, пред се, на потребата од спроведување на одлуките на Советот за безбедност на ОН за создавање на независна суверена палестинска држава“, рече Путин.
