Обединетото Кралство работи на планови што ќе значат дека луѓето кои се заразени со коронавирус нема да бидат обврзани легално да се изолираат, објави британски Телеграф.
Премиерот Борис Џонсон сака трајно да ги укине законите за итни случаи за коронавирусот, бидејќи бројот на случаи на коронавирус во Велика Британија продолжува да се намалува, се наведува во извештајот, пренесува Ројтерс.
Се додава дека официјалните упатства ќе останат, но нема да резултираат со парични или законски казни доколку се игнорираат.
Плановите ќе бидат разработени во наредните недели, а објавувањето се очекува на пролет, се наведува во извештајот.
Минатата недела, министерот за здравство Саџид Џавид рече дека самоизолацијата во Англија ќе се намали на пет дена од сегашните седум, доколку некој е негативен двапати.
Џонсон, исто така, е подготвен да ги укине ограничувањата за коронавирусот поврзани со планот Б, кои беа воведени минатиот месец со цел да се забави ширењето на варијантата Омикрон, се вели во претходен извештај на британски Телеграф.
