Демонстрантите денеска упаднаа во приватната резиденција на премиерот на Шри Ланка Ранил Викремесинге и ја запалија неколку часа откако тој рече дека ќе поднесе оставка кога ќе се формира новата влада.
Кабинетот на премиерот соопшти дека демонстрантите насилно влегле во неговата куќа во Коломбо, пренесе АП.
Засега не е познато дали премиерот бил во резиденцијата во моментот на нападот, додава американската агенција.
Викремесинге потврди дека ќе поднесе оставка по бегството на претседателот Готабаја Рајапакса по протестите со кои се бара негова оставка.
– За да се обезбеди продолжување на работата на Владата, вклучително и безбедноста на сите граѓани, ја прифаќам најдобрата препорака на лидерите на партиите да се овозможи работата на Владата, која ќе ја сочинуваат претставници на сите партии. – напиша тој на Твитер, а пренесе ТАС С.
– За да биде полесно, ќе поднесам оставка од премиерската функција – посочи тој.
Викремесинг ја објави својата одлука по состанокот на лидерите на политичките партии со кој претседаваше претседателот на парламентот на Шри Ланка, Махинда Јапа Абејвардена.
Раџапакса очигледно ја напушти земјата со авион, изјави за ТАС С поранешниот амбасадор на Шри Ланка во Русија, Удајанг Вератунга, кој се наоѓа во Коломбо.
Илјадници демонстранти излегоа на улиците на Коломбо барајќи оставка од претседателот на Шри Ланка, а некои од нив влегоа и во претседателската резиденција.
За време на протестот повредени се 39 лица, меѓу кои и двајца полицајци, кои се хоспитализирани.
Земјата со 22 милиони жители се бори со сериозен девизен недостиг што го ограничи суштинскиот увоз на гориво, храна и лекови, втурнувајќи ја во најголемата економска криза од независноста во 1948 година, објави Ројтерс.
Многумина за ова го обвинуваат претседателот Раџапакса, а од март годинава се водат главно мирни протести.
Незадоволството се влоши во последните недели бидејќи земјата ги затвори училиштата и ја рационализираше потрошувачката на гориво, а инфлацијата достигна речиси 55 отсто во јуни, потсетува британската агенција.
