Францускиот претседател Емануел Макрон изрази подготвеност да биде домаќин на претставници на бугарските и македонските власти кога „ќе дојде време“ да се склучи билатерален договор што ќе овозможи отворање на преговорите за пристапување на Македонија во Европската унија (ЕУ).
Франција, која претседава со ЕУ до 1 јули, веќе неколку недели бара решение за спорот меѓу двете земји, соопшти синоќа Елисејската палата по телефонските разговори на Макрон со бугарскиот претседател Румен Радев и Македонскиот премиер Димитар Ковачевски. .
За време на тие разговори, Макрон изразил „целосна поддршка за договорот меѓу двете земји, што ќе придонесе за добрососедските односи и ќе ја зајакне европската перспектива на Македонија“, соопшти француското претседателство.
Бугарија го блокираше пристапот на Македонија во ЕУ во ноември 2020 година поради јазични и историски спорови.
Пред бугарската блокада, Македонија со години беше соочена со ветото на Грција, која го отфрли нејзиното име Македонија, бидејќи така се вика и нејзината провинција на север, сметајќи ја како узурпација на нејзиното историско наследство.
Атина го укина ветото дури во 2018 година, кога на името на државата Македонија беше додадена северна.
Од крајот на февруари до почетокот на март годинава, Украина, Грузија и Молдавија сукцесивно поднесоа барања за членство во ЕУ, по почетокот на руската офанзива во Украина.
Очекувајќи долг процес на интеграција на земјите кандидати, на 9 мај, Макрон предложи забрзан пристап на Украина во ЕУ преку создавање на европска политичка заедница.
Пет земји во моментов се официјално кандидати за членство во ЕУ – Македонија, Црна Гора, Србија, Албанија и Турција.
Во 2019 година, Макрон, заедно со уште две земји-членки, стави вето на отворањето на пристапните преговори со Македонија и Албанија, сметајќи дека не се исполнети условите за проширување на ЕУ со овие две земји.
