Во Брјанск на 150 километри североисточно од украинската граница избувна пожар во складиштето за нафта Транснефт Брјанск Дружба во Брјанск, соопшти прес-службата на руското Министерство за вонредни ситуации.
Министерството за вонредни ситуации во Брјанск соопшти дека добиле дојава за пожар во 2 часот по полноќ по московско време.Евакуација на населението не е планирана, а според првичните податоци во пожарот нема повредени, пренесува Интерфакс.
Агенцијата РИА Новости наведува дека не е забележана зголемена концентрација на штетни материи во воздухот и додава дека граѓаните рекле дека слушнале две експлозии.
РИА Новости прецизира дека пожарот избувнал во резервоарите за складирање и во друг објект, додека агенцијата Интерфакс јавува дека пожарот избувнал во друго складиште за нафта во Брјанск.
Транснефт-Дружба (подружница на Транснефт) има цистерни со капацитет од 3,1 милиони кубни метри, а производствените капацитети на компанијата се наоѓаат во 11 руски региони. Компанијата управува со нафтоводот „Дружба“, кој испорачува нафта од Русија во Европа.
