Претседателот на Белорусија Александар Лукашенко изјави дека многу моќни сили сакаат да го спречат преговарачкиот процес меѓу Москва и Киев.
– Не дај боже Зеленски и неговиот тим да издржат и да не се лизнат во колапс на преговарачкиот процес – рече Лукашенко, пренесува агенцијата Белта.
Според него, руско-украинскиот преговарачки процес може да доведе до средба меѓу претседателите Владимир Путин и Владимир Зеленски.
Лукашенко смета дека започнатите руско-украински преговори се важни како почетна платформа за евентуална средба на двајцата претседатели. Сепак, како што рече, за да се одржи средбата делегациите на двете земји треба да подготват прашања за кои ќе се разговара, вклучително и области како демилитаризација и денацификација.
Лукашенко рече и дека досега ниту еден дел од вооружените сили на Белорусија не ја напуштил базата. Истовремено, тој додаде дека „тие се подготвени“ и дека „сите се подготвени“.
И ако е потребна мобилизација, ги проверивме сите списоци, во рок од два-три дена ќе ги мобилизираме сите единици што треба да се мобилизираат – посочи Лукашенко.
Белорускиот лидер им нареди на безбедносните сили да ја „затворат“ западната граница со цел да се спречи инвазијата на НАТО, па дури и „најмалата операција“ од нивна страна на белоруска територија.
На 24 февруари рускиот претседател Владимир Путин го објави почетокот на воената операција за демилитаризација на Украина. Обраќајќи им се на своите сограѓани, тој рече дека околностите „бараат решителна и итна акција“, бидејќи републиките од Донбас се обратиле до Москва за помош. Путин истакна дека целта на операцијата е „заштита на луѓето кои осум години биле изложени на малтретирање и геноцид од режимот во Киев“. За тоа, според него, се планира да се изврши „демилитаризација и денацификација на Украина“, да се изведат пред лицето на правдата сите воени злосторници одговорни за „крвавите злосторства над цивилите“ во Донбас.
