Хаити денеска го погоди земјотрес со јачина од 5,3 степени по Рихтер, во кој загинаа две лица и предизвика панично бегство на жителите на јужниот дел на оваа карипска држава на улиците, јавува Хрватската радио-телевизија, повикувајќи се на агенцијата Хина.
Едно лице загина во Фонд де Нгрес, а другото во Ансе-Во, каде се уништени 35 домови, соопштија властите на Хаити преку Твитер, додавајќи дека патот и мостот се уништени.
Децата побегнале од училишните згради во Ле Кај, а „луѓето биле преплашени“, иако немало никаква штета, вели еден жител.
Во август минатата година, земјотрес со јачина од 7,2 степени уништи десетици илјади домови, семејствата беа принудени да спијат на дожд, а премиерот Ариел Хенри мораше да ги одложи изборите закажани за ноември.
Лошата економија на Хаити и безбедносните проблеми поврзани со бандите поттикнаа бран миграција, при што многумина тргнаа на патувања со нестабилни бродови со надеж дека ќе стигнат до САД.
Американската крајбрежна стража во саботата извести дека пресретнала 88 Хаиќани на пренатрупан товарен брод.
Крајбрежната стража соопшти дека спасила 559 Хаиќани од 1 октомври, додека 1.527 биле спасени во 12-те месеци до октомври.
