Разработуваме модалитети за плаќање на рускиот гас во рубли, но можеме со апсолутна сигурност да кажеме дека Русија дефинитивно нема да испорачува гас бесплатно, изјави Дмитриј Песков, портпарол на Кремљ.
„Процесот на набавка е многу, многу комплициран. Ова не е купување на производ во продавницата каде што купувате и плаќате на каса, значи ова е испорака, плаќање, балансирање, ова е тековен процес“, рече Песков, а пренесува РИА Новости.
Песков прецизираше дека за ова прашање се разговара меѓу ресорите и Гаспром.
„Ќе биде поставена јасна временска рамка“, додаде тој.
Запрашан како Москва би постапила доколку Европа одбие да го плати гасот во рубли, Песков рече дека „факт е дека Русија нема да испорачува гас бесплатно“.
„Факт е дека нема да испорачаме гас бесплатно. Тоа може да се каже со апсолутна сигурност. Меѓутоа, во нашата ситуација тоа е тешко возможно и тешко е целисходно да се вклучиме во паневропска добротворна работа“, рече тој.
Потсетуваме, рускиот претседател Владимир Путин претходно им нареди на Кабинетот на министри, Централната банка на Руската Федерација и Гаспром да спроведат мерки за промена на валутата на плаќање за испорака на гас до „непријателските“ земји до 31 март. Според таа наредба, целиот гас што Русија го испорачува на земјите од ЕУ треба да се плаќа во рубли.
Европа различно реагираше на оваа одлука. Првиот човек на Франција, Емануел Макрон, рече дека „Европа нема причина да го прифати плаќањето за гас во рубли“, додека германскиот канцелар Олаф Шолц истакна дека во купопродажните договори за гасот се наведени други валути, „главно еврото и доларот“. Италијанскиот премиер Марио Драги објави дека наредбата на Путин е „прекршување на договорот“.
