Обвинителството во Швајцарија заплени околу 26 милиони долари дигитални средства и американски долари на корејскиот „крал на криптовалутите“ До Квон, пренесува специјализираниот портал „BeInCrypto“.
Корејските медиуми објавија во саботата, на 24 јуни, дека Квон има средства складирани во швајцарската банка за дигитални средства Signum, која се представува како прва банка за дигитални средства во светот и има филијали во Швајцарија, Сингапур и Абу Даби.
До Квон и корејскиот државјанин Хонг Чан Јун на 19 јуни во Основниот суд во Подгорица беа осудени на по четири месеци затвор за фалсификување патни исправи. Тие беа уапсени на 23 март на аеродромот во Подгорица, кога при пасошка контрола на летот за Дубаи користеле фалсификувани пасоши од Костарика, пренесува Vijesti.me.
Додека Квон се соочува со кривично гонење во Јужна Кореја и САД, подсетува BeInCrypto, иследниците бараа начини да го следат неговиот имот. Швајцарските обвинители ги замрзнаа средствата на барање на американската Комисија за хартии од вредност (SEC) и федералните обвинители на Њујорк.
Јужна Кореја и САД бараат екстрадиција на До Квон, поради измама со десетици милијарди долари преку криптовалути.
Сумата е поголема од претходните проценки
Износот на замрзнатите средства е двојно поголем од претходните проценки на обвинителството. Јужнокорејските обвинители претходно изјавија за Блумберг дека Квон и неговите помошници имаат повеќе од 13 милиони долари во Сигнум.
Според BeInCrypto, американските и швајцарските истражители веројатно пронашле други средства кои претходно не биле идентификувани. Американската ДИК објави дека Квон испратил 10.000 биткоини на швајцарска сметка.
„Со оглед на тоа што некои од средствата поврзани со дебаклот на Тера Луна сега се замрзнати, жртвите на инцидентот што збриша околу 40 милијарди долари од крипто-пазарот може да се надеваат дека ќе бидат компензирани за нивните загуби“, се вели во извештајот.
