ВОЈНАТА во Украина влезе во 571-от ден.
Руските сили соборија два дрона над Москва и уште два во близина на Крим
Руската воздушна одбрана денеска собори украинско беспилотно летало над московската област Истра, соопшти градоначалникот на Москва Сергеј Собјанин.
– Според првичните информации, во нападот со дрон нема материјална штета или повредени лица – изјави Собијанин на апликацијата Телеграм.
Тој додаде дека противвоздушната одбрана соборила уште еден украински дрон над територијата на Москва, поточно во областа Раменски. И во овој напад нема штета или повредени, јавува Ројтерс. Руските сили денеска соборија уште две украински беспилотни летала во близина на западниот брег на Крим, соопшти руското Министерство за одбрана. Министерството не соопшти дали има материјална штета во овој напад со дрон, ниту дали има повредени, пренесува Танјуг.
Експлозии во регионот Одеса
Неколку експлозии одекнаа во регионот на Одеса, јави порталот „Неделно огледало“.
Украинските власти традиционално ги објаснуваат експлозиите како работа на системи за противвоздушна одбрана.
Украинската армија со недели ги интензивира нападите на Крим: Зошто овој полуостров е важен за двете страни?
Преземањето на полуостровот значително би ја ослабело Русија, но не би гарантирало крајот на војната.
Украинската војска ги нападнаа руски воени позиции на анектираниот полуостров Крим во четвртокот рано наутро. Цел на нападот, според информациите на украинските медиуми, бил противвоздушниот систем С-300 или помодерниот систем С-400 во близина на градот Евпаторија.
Тоа ќе биде втор ваков систем нападнат на Крим во рок од неколку недели. Руската војска овојпат известила само за наводно одбиениот напад со дрон, без детали.
Претходната ноќ Украина извести за спектакуларен напад во Севастопол, главната база на Црноморската флота. Според извештаите од Киев, руски воен брод и подморница биле погодени со крстосувачки ракети.
Двата брода, како што се наведува, биле тешко оштетени. Руското Министерство за одбрана најави дека ќе се санираат штетите на бродовите.
Непосредно пред инвазијата минатиот февруари, украинското Министерство за одбрана го процени бројот на руски војници на Крим на 32.000. Се вели дека таму е стационирано и нуклеарно оружје.
База на Црноморската флота
Зошто Крим е толку важен за двете страни? Покрај симболичното значење што постојано го нагласува рускиот претседател Владимир Путин, полуостровот има пред се и воено значење.
Црноморската флота, која е стационирана таму, ги напаѓа украинските градови со крстосувачки ракети „Калибр“ – од внатрешноста на земјата сè до границата со членките на ЕУ. Истото важи и за авионите стационирани на Крим, кои се опремени со проектили.
Крим исто така игра централна улога во снабдувањето на руските војници во јужна Украина. Конечно, поморската блокада на украинските пристаништа тешко би можела да ја спроведе Русија без Крим.
Веднаш по инвазијата, Русија зазеде поголеми области од Крим и на тој начин ја обезбеди копнената врска на полуостровот со Русија. Украинската армија од почетокот на летото се обидува да ја прекине оваа врска со контраофанзива.
Армијата, меѓу другото, ги напаѓа сите мостови што го поврзуваат Крим со копното. За таа цел главно се користи западно прецизно оружје, вклучувајќи британски и француски крстосувачки ракети.
Да се пробие на Крим па да се преговара?
Главниот командант на украинската армија, генерал Валериј Залужни, минатата есен во стратешки документ го окарактеризира Крим како „клучен фактор“ во руската војна против Украина.
Преземањето на полуостровот значително би ја ослабело Русија, но не би гарантирало крај на војната. Русија би можела да продолжи со нападите од своето копно дури и по загубата на Крим, предупреди Залужни.
Претседателот Володимир Зеленски се уште се надева на пробив. Тој рече дека војната почнала на Крим и дека таму ќе заврши, пишува ДВ.
Најдобрата опција за Киев би била да напредува кон Крим и потоа да преговара за повлекување на руските сили. Во моментов, сепак, тешко е да се замисли дека Русија би се согласила на тоа.
