Кина ги обвини Соединетите Американски Држави за поткопување на регионалната стабилност додека официјален Пекинг реагираше на медиумските извештаи за американските планови за распоредување на бомбардери Б-52 на нуклеарен погон во северна Австралија.
Коментирајќи ги овие натписи, портпаролот на кинеското Министерство за надворешни работи, Жао Лиџијан денеска изјави дека одбранбената и безбедносната соработка меѓу земјите „не треба да ги таргетира трети страни“ или да им наштети на нивните интереси.
Жао додаде дека однесувањето на САД ги зголеми регионалните тензии, сериозно го поткопа регионалниот мир и стабилност и може да предизвика трка во вооружување во регионот. Како што рече, „Кина апелира до заинтересираните страни да се откажат од надминатата студена војна и тесноградното геополитичко размислување и да направат нешто што ќе придонесе за регионалниот мир и стабилност и зајакнување на меѓусебната доверба меѓу земјите“, објави „Спутник интернешнал“.
Тој го изјави ова откако The Australian News објави дека американската војска размислува да распореди стратешки бомбардери Б-52 во Австралија во обид да создаде долгорочен центар во регионот во услови на тековни тензии на администрацијата на Бајден со Кина.
Извештајот цитира неименувани упатени лица кои велат дека до шест такви бомбардери ќе бидат стационирани во оддалечената воздухопловна база Тиндал во северна Австралија.
Тензиите меѓу Пекинг и Вашингтон околу Тајван ескалираа на почетокот на август, кога претседателката на американскиот Претставнички дом Ненси Пелоси го посети островот и покрај предупредувањето на Кина за далекусежни последици за овој потег.
Пекинг ја осуди посетата на Ненси Пелоси како гест на поддршка за сепаратизмот и започна големи воени вежби во близина на островот. И покрај ова, оттогаш други делегации на високо ниво на САД го посетија Тајван, кои беа придружени со строга реторика од Пекинг.
Кина го третира Тајван како составен дел од нејзината суверена територија и се противи на какви било официјални врски меѓу островот и другите земји. Вашингтон одржува активни контакти со официјален Тајпеј и продава оружје во вредност од милијарди долари на Тајван.
Во септември 2021 година, Австралија, од своја страна, склучи договор со САД и ОК според трилатералниот безбедносен пакт наречен AUKUS. Според договорот, Вашингтон и Лондон ветија дека ќе и помогнат на Канбера да набави подморници на нуклеарен погон.
Ванг Кун, постојаниот претставник на Кина во ОН во Виена, подоцна за кинеските медиуми изјави дека AUCUS не е ништо повеќе од бесрамен и неодговорен чин на неширење нуклеарно оружје, што уште еднаш докажува дека земјите од AUCUS практикуваат „двојни стандарди“ во однос за намалување на нуклеарното оружје.
