Во Велика Британија е прогласена вонредна состојба откако за прв пат беше издадено црвено предупредување за екстремни горештини, бидејќи температурите може да достигнат и 40 степени Целзиусови. Од Метеоролошката агенција предупредуваат дека може да има болест и смрт и кај здрави луѓе
Предупредувањето од Мет офис за понеделник и вторник ги вклучува Лондон, Манчестер и Јорк, објави Би-Би-Си.
Тоа значи дека постои ризик по животот, а дневните рутини ќе мора да се сменат.
Ќе има ограничена брзина на железничките линии, некои училишта ќе бидат предвреме затворени, а некои посети на лекари ќе бидат откажани.
Ќе се посипува песок по патиштата за да се намали топењето на асфалтот, а службата за помош на пат предупреди дека на повеќе возачи ќе им биде потребна помош поради прегревање на нивните автомобили.
Метеоролошката агенција издаде предупредување за највисоко ниво четири и додаде дека болеста и смртта може да има дури и кај здрави луѓе.
Здравствените власти стравуваат дека луѓето кои живеат сами на повисоките катови од зградите се меѓу оние кои би можеле да умрат, како што се случи во Париз во 2003 година, пишува Гардијан. Минатата година, два помали топлотни бранови предизвикаа уште околу 1.600 смртни случаи, според официјалните податоци
Се предвидуваат и рекордни ноќни температури, кои би можеле да бидат над 25 степени Целзиусови во Лондон и делови од северозападниот дел. Ова ќе создаде поголем товар на човечкото тело, а токму тоа е клучниот фактор за зголемување на смртноста.
Инаку, ова е првпат црвено предупредување за висока температура да биде издадено за делови од ОК, иако системот за предупредување за екстремна температура не беше воведен дури во 2021 година.
