Повеќе од 5.200 луѓе загинаа, а најмалку 10.000 се водат како исчезнати во ужасните, невидени поплави што ја погодија источна Либија.
Бројот на загинати само во еден град е повеќе од 1.500, изјави за Би-Би-Си министер кој го посети источното пристаниште Дерна.
„Бев шокиран од она што го видов, тоа е како цунами“, рече Хишам Чкиват од владата со седиште во истокот.
Поголемиот дел од Дерна, дом на околу 100.000 луѓе, е под вода откако се урнаа две брани и четири моста.
До 10.000 луѓе се водат како исчезнати по поплавите како последица на бурата Даниел, соопшти Црвената полумесечина, пренесува Би-би-си.
Невремето, кое во неделата ја погоди Либија, ги зафати и источните градови Бенгази, Суза и Ал-Марџ.
Чкиуат, министер за авијација и дел од владиниот комитет за итни случаи на исток, изјави за Би-Би-Си дека уривањето на една од браните јужно од Дерна одвлекла големи делови од градот во морето.
„Уништена е огромна населба – има голем број жртви, кој секој час се зголемува. Немаме точни бројки, но тоа е катастрофа“, рече тој и додаде дека „браната што се урна не се одржуваше некое време“.
Тој претходно изјави за Ројтерс дека четвртина од градот исчезнал.
Тамер Рамадан, шеф на Меѓународната федерација на друштвата на Црвениот крст и Црвената полумесечина (IFRC) во Либија, за новинарите изјави дека бројот на загинати најверојатно ќе биде „огромен“.
Покрај областите на исток, меѓу погодените од поплавите е и западниот град Мисрата.
Либија е во политички хаос откако долгогодишниот владетел полковник Моамер Гадафи беше соборен и убиен во 2011 година – оставајќи ја нацијата богата со нафта ефективно поделена со привремена, меѓународно призната влада која работи од главниот град Триполи и друга на истокот.
Чкиуат рече дека помошта е на пат и дека источната администрација ќе прифати помош од владата во Триполи, која испрати авион со 14 тони медицински материјали, торби за тела и повеќе од 80 лекари и болничари.
Американскиот специјален пратеник за Либија Ричард Нортон изјави дека Вашингтон ќе испрати помош во источна Либија во координација со партнерите на ОН и либиските власти.
Египет, Германија, Иран, Италија, Катар и Турција се меѓу земјите кои рекоа дека испратиле или се подготвени да испратат помош.
Дерна, на околу 250 километри источно од Бенгази долж брегот, е опкружена со блиските ридови на плодниот регион Џабал Акдар.
